काठमाडौं- रूपन्देही ११ प्रो क्लब टी–ट्वान्टी क्रिकेट च्याम्पियनसिपको सेमिफाइनलमा प्रवेश गरेको छ ।

भैरहवास्थित सिद्धार्थ क्रिकेट रंगशालामा बुधबार भएको खेलमा पुश स्पोर्टस क्लब दिल्लीसँग ४ विकेटले पराजित भएपनि उच्च रनरेटका आधारमा रूपन्देही सेमिफाइनलमा प्रवेश गरेको हो ।

समुह एको उपविजेता बन्दै रूपन्देही सेमिफाइनलमा पुगेको हो । यता पुश क्लब दिल्ली भने समुह चरण मै रोकियो ।

टस जितेर ब्याटिङ रोजेको रूपन्देहीले निर्धारित २० ओभरमा १ सय ३ रन बनायो । रूपन्देहीका लागि विशाल विक्रम केसीले २९ रन र बसिर अहमदले २८ रन जोडे ।

रुपन्देहीलाई उच्च योगफल बनाउनबाट रोक्न पुश क्लबका स्पर्श, प्रणय प्रसाद, विशेष सारोह, मयंक गुप्ता र हर्षवर्द्धन फोगटले २–२ विकेट लिए ।

१ सय ६ रनको लक्ष्य दिल्लीले १८ ओभरमा ६ विकेट गुमाएर भेटायो । उसका लागि विशेष सरोहले २६ रन र मृगांक पाठकले १९ रन बनाए ।रूपन्देहीका लागि भने विशाल र बिक्रम भुसालले २–२ विकेट तथा रूपेश कुर्मी र बसिर अहमदले १ विकेट लिए । 

यससँगै प्रो क्लब क्रिकेटको सेमिफाइनल समीकरण पूरा भएको छ । पहिलो सेमिफाइनलमा बिहीबार समुह ए को विजेता मलेसिया ११ र समुह बीको उपविजेता उत्तर प्रदेश ११ बिहान १० बजे आमने सामने हुनेछन् ।

दोस्रो सेमिफाइनलमा समुह बीको विजेता नेपाल आर्मी र समुह एको उपविजेता रूपन्देही ११ दिउँसो २ बजे भिड्नेछन् ।