काठमाडौं– भ्रष्टाचारको अभियोग लागेका विश्व फुटबल महासंघ फिफाका पूर्व अध्यक्ष सेप ब्लाटर र युरोपेली फुटबल महासंघ युएफाका पूर्व अध्यक्ष मिशेल प्लाटिनीको मुद्दाको सुनुवाइ जुन महिनामा हुने भएको छ ।

स्विट्जरल्याण्डको अदालतमा उनीहरुको सुनुवाइ जुन ८ मा शुरु भएर जुन २२ सम्म चल्ने खेलकुद पोर्टल इएसपीएनले जनाएको छ ।

दुबैजनाविरुद्ध भ्रष्टाचारको मुद्दा चलिरहेको छ । फिफाको अध्यक्ष रहँदा ब्लाटरले प्लाटिनीलाई २० लाख डलर घुस दिएको बताइएको छ । यद्यपि दुवैले यस आरोपको खण्डन गर्दै आएका छन् ।

अभियोजकहरुका अनुसार ब्लाटरले सन् २०११ मा सल्लाहकार कम्पनीका लागि भन्दै २० लाख डलर अनियमित रुपमा प्लाटिनीलाई दिएका थिए । दुबैले ढिला भई आएको तलबको मात्र भुक्तानी भएको बताउने गरेका छन् ।

यो भ्रष्टाचार प्रकरण फिफाको इतिहासमै सबैभन्दा ठूलो रहेको इएसपीएनले जनाएको छ ।