मुम्बई(अमर उजाला)– अभिनेता सुशान्तसिंह राजपुतको निधन उनका फ्यानका लागि निकै हृदयविदारक रह्यो । उनको निधनका डेढ वर्ष बितिसक्दा पनि उनका फ्यानहरु सामाजिक सञ्जालबाट न्यायको माग गरिरहेका छन् । यहीबीचमा उनको बायोपिक बन्ने चर्चा नचलेको पनि होइन ।

यही बीचमा उनकी दिदी प्रियंकाले सामाजिक सञ्जालमा एक पोस्ट गर्दै तत्कालका लागि सुशान्तको बायोपिक आवश्यक नरहेको दाबी गरेकी छन् । ‘मलाई विश्वास छ कि सुशान्तले न्याय नपाउञ्जेलसम्म उनको बायोपिक बनाउन आवश्यक छैन् । यो मेरो भाई, कलाकार प्रतिभाशाली सुशान्तसिंह राजपूतसँग प्रतिबद्धता हो’, उनले लेखेकी छन् ।

उनले पर्दामा आफ्नो भाईको जस्तो सुन्दर, निर्दोष र गतिशिल व्यक्तित्वको प्रदर्शन गर्ने क्षमता कुनै पनि कलाकारमा नरहेको दाबी गरेकी छन् । ‘सुशान्तको कथालाई पर्दामा उतार्न सक्ने क्षमता बलिउडमा कसैसँग छैन’, उनले लेखेकी छन् ।

प्रियंकाका अनुसार सुशान्त आफ्नै बायोपिकमा अभिनय गर्न चाहन्थे । ‘तर उनको बायोपिक बनेको अवस्थामा एआई प्रविधिको प्रयोगले उनको चरित्रलाई निर्माण गर्न सकिन्छ । भविष्यमा प्रविधिको प्रयोगले यो काम गर्न सकिन्छ’, उनले भनेकी छन् ।