काठमाडौँ – आज २०७९ साल भदौ २७ गते सोमबार। सन् २०२२ को सेप्टेम्बर १२ तारिख। आजको दिन इतिहासमा भएका केही महत्त्वपूर्ण घटनाक्रम यस्ता छन् :

सन् १९९२ सेप्टेम्बर १२ मा माई जेमिसन अन्तरिक्षमा जाने पहिलो अफ्रिकी–अमेरिकी महिला बनेकी थिइन्। जेमिसनले अन्तरिक्षमा १ सय ९० घण्टा समय बिताएकी थिइन्। नासाको सो ५० औँ अन्तरिक्ष यान अभियान थियो।

सन् १९८० सेप्टेम्बर १२ मा टर्कीमा सैन्य कु भएको थियो। यो टर्कीको इतिहासको तेस्रो कु थियो।

सन् १९७४ सेप्टेम्बर १२ मा इथियोपियामा भएको कुपछि सम्राट हाइले सेलासी पदच्युत भएका थिए।

सन् १९७० सेप्टेम्बर १२ मा सोभियत संघले ‘लुना १६’ नामक यान प्रक्षेपण गरेको थियो।

सन् १९५३ सेप्टेम्बर १२ मा रोड आइल्याण्डको न्यूपोर्टमा ज्याकलिन ली बोवी र जोन एफ केनेडीको विवाह भएको थियो।

सन् १९४३ सेप्टेम्बर १२ मा हिटलरको आदेशमा जर्मन पाराट्रुपरहरुले ‘द ग्रान सासो रेड’ सञ्चालन गरेका थिए। इटालीका राजाको आदेशमा स्कि रिसोर्टमा बन्धक बनेका शासक बेनिटो मुसोलिनीलाई छुटाउन सो अभियान सञ्चालन गरिएको थियो।

सन् १९१३ सेप्टेम्बर १२ मा खेलाडी जेसी ओवेन्सको जन्म भएको थियो। सन् १९३६ मा आयोजना भएको बर्लिन ओलम्पिकमा ओवेन्सले ट्रयाक एण्ड फिल्ड खेलमा ४ पदक जित्न सफल भएका थिए।