काठमाडौं– प्रख्यात दक्षिण कोरियाली आरोही सुङ तेक होङले दक्षिणी मोहोडाबाट ल्होत्से हिमालको सातौँ पटक आरोहण गर्ने भएका छन् ।

काठमाडौंमा मंगलबार आयोजित पत्रकार सम्मेलनमा होङले यसबारे जानकारी दिएका हुन् । ‘दक्षिणी मोहोडाबाट म ल्होत्से आरोहणको सातौँ प्रयास गर्दैछु ।’ ५५ वर्षे होङले भने ।

उनको आरोहण दलमा उनीसँगै म्युङ सुक कोह, ब्योङ ताए, जुपिल पार्क, नाक्जोङ सोङ, जाए चुल किम, योर्गे एगोक्सेरागा रोड्रिग्वेज र भादिम पिर्मिन ड्रुले गरी ८ सदस्य छन् ।

आरोहण दलमा थप १४ शेर्पा पनि सहभागी हुने आरोहण अभियानको व्यवस्थापक सेभेन समिट ट्रेक्सले जानकारी दिएको छ ।

विश्वको चौथो अग्लो ल्होत्से हिमाल आरोहणका हिसाबले विश्वकै सबैभन्दा कठिनमध्ये एक हो । यसअघि होङले सन् १९९५ मा तिब्बती मोहोडाबाट सगरमाथा आरोहण गरिसकेका छन् ।

उनी ल्होत्से आरोहणका लागि बुधबार लुक्ला तर्फ लाग्ने जनाइएको छ ।