काठमाडौँ– चीनले मुलुकको पश्चिममा रहेको सिन्जियाङ प्रान्तमा आणविक हतियार परीक्षण केन्द्र निर्माण गरिरहेको खुलासा भएको छ ।

भू उपग्रहमार्फत् लिइएको तस्वीरको विश्लेषणबाट चीनले मुलुकको पश्चिममा रहेको सिन्जियाङ उइगुर स्वशासित क्षेत्रमा आणविक हतियार परीक्षण केन्द्र निर्माण गरिरहेको पाइएको हो ।

जापानबाट प्रकाशित हुने निक्के एसियाले भू उपग्रहमार्फत् लिइएका तस्वीरमा चीनले आणविक हतियार परीक्षण केन्द्र निर्माण गरिरहेको उल्लेख गरेको छ ।

सिन्जियाङ प्रान्तको दक्षिण पूर्वमा पर्ने नुनिलो पानीको लोप नोर नामक तालबाट ४५० किलोमिटर माथिबाट भू उपग्रहले तस्वीर खिचेको जनाइएको छ ।

भारतीय समाचार संस्था एएनआईका अनुसार केही विश्लेषकहरुले यस गोप्य आणविक हतियार परीक्षण केन्द्रलाई चीनको जनमुक्ति सेनाले सुरक्षित गरिसकेको हुनसक्ने जनाएका छन् ।

चीनले लोप नोर ताल क्षेत्रमा पाँच पटक आणविक हतियार परीक्षण गरिसकेको छ । पछिल्लो समय चीनले सन् १९९६ मा लोप नोरमा आणविक हतियार परीक्षण गरेको थियो ।

विश्वमा आणविक हतियारको होडबाजी चलिरहेको चिन्तामाझ चीनले आणविक हतियार परीक्षण केन्द्रको निर्माण गरिरहेको विषयलाई निकै चासोपूर्वक हेरिएको छ ।