काठमाडौँ– गत जेठ ५ गते अभिनेत्री सुरक्षा पन्त प्रतिष्ठित कान्स फिल्म फेस्टिभलमा रेडकार्पेट नाप्ने पहिलो नेपाली अभिनेत्री बनिन् । उनी नेपाली फिल्म नभई इटाली र बेल्जियमको फिल्म ‘द एइट् माउन्टेन्स’ मुख्य प्रतिस्पर्धामा छानिएकाले उक्त अवसर पाएकी थिइन् । फिल्ममा उनले नेपाली युवतीको भूमिका नै निर्वाह गरेकी छिन् । नेपाली कला र संस्कृति झल्किने पहिरन नलगाएता पनि नेपाली कलाकार कान्सको रेडकार्पेटमा देखिएकोमा नेपालीले खुशी नै व्यक्त गरे । 

सुरक्षाको यो सफलतालाई नेपालको लोकसेवा आयोगले पनि पछ्याएको छ । असार २३ गते भएको नेपाली सेना, अधिकृत क्याडेट पदको खुला प्रयोगात्मक लिखित परीक्षामा यसबारे प्रश्न सोधिएको छ । प्रश्न नम्बर १९ मा लोकसेवाले सोधेको छ, ‘फ्रान्समा भएको कान्स फिल्म फेस्टिभलमा रेड कार्पेटमा हिँड्ने मौका पाउने पहिलो नेपाली अभिनेत्री को हुन् ? प्रश्नमा चारवटा विकल्प छन्– प्रियंका कार्की, सुरक्षा पन्त, गौरी मल्ल र करिश्मा मानन्धर ।

लोकसेवाको प्रश्नपत्र फेसबुकमा सेयर गर्दै सुरक्षाले खुसी व्यक्त गरेकी छन् । ‘लोकसेवाको प्रश्नमा एउटा उत्तर हुँदाको क्षण’ उल्लेख गर्दै उनले हर्ष व्यक्त गरेकी छन् । लोकसेवाको प्रश्नलाई सरकारी अभिलेखको एउटा आधार पनि मानिने भएकाले सुरक्षा मात्र होइन, नेपाली फिल्म उद्योगकै लागि यो खुसीको कुरा हो । उनले आफ्नो शुभचिन्तक मार्फत उक्त कुरा थाहा पाएको भन्दै खुसी व्यक्त गरेकी हुन् ।