काठमाडौँ- उत्तर कोरियामा पहिलो पटक महिलालाई विदेशमन्त्रीमा नियुक्त गरिएको छ । अनुभवी कूटनीतिज्ञ चोए सोन हुइलाई उत्तर कोरियाको विदेश मन्त्रालयको जिम्मेवारी दिइएको हो ।

यसअघि उपविदेश मन्त्रीको रुपमा रहेकी हुइले निवर्तमान विदेशमन्त्री रि सोन ग्वोनलाई विस्थापित गरेकी हुन् ।

कूटनीतिक सेवाको पृष्ठभूमिकी उनले दुईपक्षीय वार्ताका क्रममा पनि विगतमा महत्वपूर्ण योगदान गरेको जनाइएको छ । उनलाई अङ्ग्रेजी भाषाको पनि राम्रो ज्ञान रहेको बताइन्छ ।

अमेरिकाका तत्कालीन राष्ट्रपति डोनाल्ड ट्रम्प समेत सहभागी भएको उत्तर कोरिया र अमेरिकी शीर्ष नेताहरूको शिखर बैठकमा पनि उनले महत्वपूर्ण भूमिका खेलेकी थिइन् ।

अन्य देशहरूसँगको विविध वार्ता तथा छलफलहरूमा पनि सहभागी भएको र विदेशी कतिपय कूटनीतिज्ञहरूसँग पनि आफ्नै विशेष सम्बन्ध भएकाले उनले उत्तर कोरियाली विदेश मन्त्रालयको जिम्मेवारी कसरी सम्हाल्छिन् भन्ने चासो रहेको अन्तर्राष्ट्रिय सञ्चारमाध्यमहरुले जनाएका छन् ।