काठमाडौँ– अभिनेता अजय देवगण अभिनीत फिल्म ‘सन् अफ सरदार’ र शाहरुख खान अभिनीत फिल्म ‘जब तक है जान’ बक्स अफिसमा भिडे पश्चात यी दुईको सम्बन्ध ठीकठाक नरहेको खबर मिडियामा आइरहे । मिडिया मात्र नभई यी दुईका फ्यान क्लबका सदस्यहरू पनि एकआपसमा भिड्ने गरेका छन् । यद्यपि वास्तविकता त्यस्तो नहुने अजयले बताएका छन् । अजयले एक इभेन्टमा आफ्नो सम्बन्ध शाहरुखसँग सुमधुर रहेको बताएका छन् । 

‘कहिले कहीँ हाम्रो फ्यान क्लबमा रहेका फ्यानहरू भिड्ने गरेका छन् । त्यो हेर्दा दुई कलाकार भिडे जस्तो लाग्ला । यद्यपि वास्तविकता त्यो होइन । हामी त्यसलाई गम्भीरतापूर्वक लिदैनौँ’ अजयले भने । उनले आफूहरू बीच फोनमा कुराकानी हुने र मिडियामा आए जस्तो सम्बन्ध नबिग्रिएको बताए । ‘हाम्रो सत्यता कमै मिडियामा आउने गरेका छन् । केवल हल्लाको भरमा आउने समाचारको के कुरा गर्नु’ अजयले भने । अजयको पत्नी काजोल शाहरुखसँग नजिक छिन् । यी दुईको सम्बन्ध हार्दिक छ ।