काठमाडौँ– जनता समाजवादी पार्टीको कार्यकारिणी समितिले स्थानीय तहको निर्वाचनका लागि उम्मेदवार छनौट गर्न निर्देशिका बनाएको छ ।

शुक्रबार ललितपुरमा बसेको जसपाको बैठकले निर्देशिका पारित गरेको वरिष्ठ नेता अशोक राईले जानकारी दिएका हुन् ।

निर्देशिका फागुन २९ र ३० गते बस्ने केन्द्रीय समिति बैठकमा पेश गरिने पनि उनले बताए ।

त्यस्तै, बैठकले समसामायिक राजनीतिक परिस्थिति र कार्यदिशासम्बन्धी प्रतिवेदन पारित गरेको र यो प्रतिवेदन शनिबार बस्ने संघीय परिषद्को बैठकमा पेश गरिने राईले बताए ।

संघीय परिषद्को बैठक र त्यसपछि बस्ने केन्द्रीय समितिको बैठकको अन्य एजेण्डाहरू पनि तयार गरिएको छ ।

जसपाभित्र पार्टी समायोजन, कार्यविभाजन, कार्यकारिणी समिति विस्तार, पदाधिकारी चयन, कार्यकारिणी अध्यक्षलगायत विषयमा नेताहरूबीच विवाद छ ।

यी विषयहरूमाथि परिषद् र केन्द्रीय समितिको बैठकमा छलफल हुनेसमेत जसपाले जनाएको छ ।