बेइजिङ – चीनले हङकङको जस्तो अस्थिरता दोहोरिन नदिनका लागि मकाओमा नियन्त्रण गर्ने योजना अघि बढाएको छ। मकाओमा हुन लागेको निर्वाचन र राष्ट्रिय सुरक्षाको अवस्थालाई मध्यनजर गर्दै चीनले आफ्नो राष्ट्रिय सुरक्षा नीतिलाई संशोधन गरेको पाइएको छ।

चिनियाँ सञ्चारमाध्यमहरुका अनुसार हङकङमाजस्तो स्वतन्त्रता र प्रजातन्त्रको मागका लागि कुनै आवाजहरु उठ्न नपाउन् भन्नका लागि चीनले आफ्नो सुरक्षा नीतिलाई संशोधन गर्दै मकाओमा कडाइ गर्न थालेको हो। मकाओ सरकारले आफ्नो सुशासनलाई बलियो बनाउनका लागि र राष्ट्रिय सुरक्षाका दृष्टिले सहरमा कानुनी शासन कायम गर्न डिसेम्बर १६ मा पञ्चवर्षीय योजना सार्वजनिक गरेको हो।

उक्त पञ्चवर्षीय योजनामा राष्ट्रिय सुरक्षा कानुनको पूर्णता, सञ्चारमा हुने अवरोध र आतंकवादको पूर्ण नियन्त्रण, कुनै पनि प्रतिबन्धका विषयमा निर्णय र निर्वाचन प्रणालीमा सुधारलगायतका विषयहरु उल्लेख गरिएको भ्वाइस अफ अमेरिकाले जनाएको छ।

उक्त दस्तावेजमा पछिल्लो निर्वाचन प्रणाली सुधार गर्दै सहरको शासनलाई सुरक्षित र राष्ट्रवादीहरुको हातमा सुम्पिने कुराको पनि सुनिश्चितता गरिने जनाइएको छ। हेरिटेज फाउन्डेसन एसियन स्टडिजका अध्येता माइकल कनिङहामले मकाओमा निर्वाचन प्रणालीमा सुधार गर्दै आफूले चाहेको व्यक्तिलाई मकाओको शासनमा राख्न चीनले नीति परिवर्तनको खेल खेलेको बताएका छन्।

मकाओको अहिलेको शासन नै बेइजिङ समर्थक भएको र आगामी शासनसत्तालाई थप प्रभावकारी बनाउका लागि भूमिका खेल्नेसमेत उनले बताएका छन्।