उदयपुर – मंसिर ४ मा हुने प्रतिनिधि सभा निर्वाचनका लागि उदयपुरको निर्वाचन क्षेत्र नम्बर २ मा बागी उम्मेदवारी परेको छ।

गठबन्धनका तर्फबाट नेकपा एकीकृत समाजवादीका जगनाथ खतिवडाको उम्मेदवारीविरुद्ध नेपाली कांग्रेसका क्षेत्रीय सभापति रामकुमार राई र निर्वाचन क्षेत्र नम्बर २ (ख) मा गठबन्धनका रामकुमार खत्रीकोविरुद्धमा नेकपा माओवादी केन्द्रका हेम दाहालले स्वतन्त्र उम्मेदवारी दर्ता गराएका छन् ।

सबैको सल्लाहमा स्वतन्त्र उम्मेदवारी दिएको राईले बताएका छन् । राई कांग्रेस क्षेत्र नम्बर २ का बहालवाला क्षेत्रीय सभापति, पूर्व जिल्ला सचिव, महाधिवेशन प्रतिनिधि, महासमिति सदस्य हुन् । कटारी क्षेत्रमा लोकप्रिय ५१ वर्षीय राई २०५४ को स्थानीय निकायको निर्वाचनमा नेपाली कांग्रेसबाट कटारी गाविसका निर्वाचित अध्यक्ष हुन् ।

लामो समय पार्टीभित्र काम गर्दा पनि उचित मूल्यांकन  नभएकाले स्वतन्त्र उम्मेदवारी दिएको राईले बताए ।