काठमाडौँ- पाकिस्तानका पत्रकारले स्थानीय एआरवाई न्युज टेलिभिजनका प्रमुख अम्माद युसुफको गिरफ्तारीको निन्दा गरेका छन् । उनलाई बुधबार पक्राउ गरिएको थियो ।

पत्रकारहरुले उनको गिरफ्तारीको निन्दा गर्दै उनको तत्काल रिहाइको माग समेत गरेका छन् । सादा पोशाकमा आएका प्रहरीले उनको घरमा जबरजस्ती प्रवेश गरी पक्राउ गरेको भारतीय समाचर संस्था एएनआईले जनाएको छ ।

पत्रकार सङ्घ र प्रेस क्लबले एआरवाई न्यूजका प्रमुख युसुफको गिरफ्तारीको निन्दा गर्दै उनलाई तत्काल हिरासतमुक्त नगरे देशव्यापी आन्दोलनको आह्वान गर्ने चेतावनी दिएका छन् ।

पाकिस्तान फेडरल युनियन अफ जर्नलिस्ट (पीएफयूजे) ले वक्तव्य जारी गर्दै सरकारको लज्जास्पद कारवाहीको विरोध गरेको छ ।

प्रधानमन्त्री शहबाज सरिफले युसुफलाई तत्काल रिहा गर्न निर्देशन दिनुपर्ने उक्त युनियनले बताएको छ । पिएफयूजेका महासचिव एएच खानजादाले युसुफलाई तत्काल रिहा नगरिए पत्रकारले देशव्यापी आन्दोलनको आह्वान गर्ने बताए ।

अभिव्यक्ति स्वतन्त्रतामा प्रतिबन्ध कुनै पनि हालतमा नसहने कराँची प्रेस क्लबका सचिव रिजवान भट्टीले भनेका छन् ।

पाकिस्तानको विद्युतीय सञ्चार नियामक प्राधिकरणले सोमबार कारण देखाउ सूचना पठाएपछि उनलाई पक्राउ गरिएको हो ।

यसैबीच, नेटवर्कका संस्थापक तथा प्रमुख कार्यकारी अधिकृत सलमान इकबालसहित अन्य दुई ‘एङ्कर’ विरुद्ध देशद्रोहको मुद्दा दायर गरिएको छ । उनीहरूमाथि देशद्रोह र षड्यन्त्रको आरोप लगाइएको छ ।