काठमाडौं- रक्तदानका लागि जनचेतना जगाउन शनिबार साइकल र्‍याली हुने भएको छ।

ब्लड डोनर्श एशोसीएशन अफ नेपाल र खबरहबको सहकार्यमा भोलि (शनिवार) बिहान ७ बजेदेखी स्वयम्भु नजिकै चमती रोप वे मार्गबाट साइकल र्‍याली सुरु हुने छ।

साइकल र्‍याली स्वयम्भु भगवान पाउ, डल्लु, लकतिर्थ विष्णुमती, कङकेश्वरी मन्दिर, नरदेबी, क्षेत्रपाटी, ठमेल, ठैंटी, असन, इन्द्रचोक, नयाँ सडक, जैसिदेवल, कोहिटी, कालीमाटी चोक, टंकेश्वर, नेपाल रेडक्रम कालीमाटी, रबिभवन, कुलेश्वर, टेकु, सानेपा पुल, कुपण्डोल, पाटन ब्लड बैंक, कोटेश्वर महादेश स्थान, सिनामंगल विमानस्थल वरपर, जयबागेश्वरी, सिफल, कालोपुल, प्रहरी प्रधान कार्यालय नक्साल, लैनचौर, सामखुसी, नयाँ बसपार्क लगायतको परिक्रमा गरिनेछ।

साइकल र्‍याली तारकेश्वर नगरपालिकाको मनमैजु मन्दिर प्राङ्गणमा पुगेर रक्तदान कार्यक्रम गरी समापन हुनेछ। साइकल यात्रीहरु जुनसुकै स्थानबाट समेत सहभागी हुनसक्ने व्यवस्था मिलाइएको आयोजकले जनाएका छन्। सामाजिक कार्यका लागि साइकल र्‍याली आयोजना गर्न लागिएकाले इच्छुक सबैमा र्‍यालीमा सहभागी हुन आयोजकले अनुरोध गरेका छन् । विश्व रक्तदाता दिवसको अवसरमा ब्लड डोनर्श एशोसीएशन अफ नेपालले साप्ताहिक कार्यक्रम सञ्चालन गरिरहेको छ।