काठमाडौँ- युक्रेनमा दैनिक एक सयदेखि दुई सय सैनिकले ज्यान गुमाइरहेको एकजना वरिष्ठ युक्रेनी अधिकारीले जनाएका छन् ।

बीबीसीका अनुसार युक्रेनी राष्ट्रपति भोलोदिमिर जेलेन्स्कीका वरिष्ठ सल्लाहकार मिखाइलो पोदोलियाकले युद्धको अग्रमोर्चामा दैनिक १०० देखि २०० को बीचमा सैनिकले ज्यान गुमाइरहेको बताएका हुन् ।

पूर्वी डोनबास क्षेत्रमा रुसी फौजको सामना गर्नका लागि युक्रेनलाई अहिले सयौँ हतियार एवम् सैनिक उपकरणको आवश्यक रहेको समेत उनले बताए । उनले रुससँग शान्तिवार्ता पुनः सुरु गर्न आफ्नो मुलुक तयार नरहेको पनि उनले उल्लेख गरे ।

पूरै डोनबासमाथि नियन्त्रण गर्ने प्रयासमा रहेका रुसी फौजहरूको निरन्तर बमबारीको युक्रेनी फौजले सामना गर्नु परेको बीबीसीले जनाएको छ ।

रुसी फौजहरूले आणविकबाहेक लगभग सबै हतियारबाट हमला गरिरहेको पोदोलियाकले बताए ।