काठमाडौँ- उत्तर कोरियाको सर्वोच्च जनसभाले आणविक शक्तिसम्बन्धी राज्यको नीतिसम्बन्धी कानून पारित गरेको सरकारसञ्चालित कोरियाली केन्द्रीय समाचार संस्था (केसीएनए) ले शुक्रबार जनाएको छ ।

उक्त कानूनले उत्तर कोरियाले आणविक युद्धलगायत सबै प्रकारका युद्धको विरोध गर्ने र शान्तिपूर्ण विश्व निर्माण गर्न चाहेको उल्लेख गरेको छ ।

”प्रजातान्त्रिक गणतन्त्र कोरियाको आणविक स्थिति विश्वसनीय, प्रभावकारी र परिपक्व आणविक प्रतिरोध, रक्षात्मक र जिम्मेवार आणविक शक्ति नीतिद्वारा प्रत्याभूत गरिएको छ,” केसीएनएले उल्लेख गरेको छ । उत्तर कोरियाले आफ्नो मुलुकलाई प्रजातान्त्रिक गणतन्त्र कोरिया भन्ने गर्छ ।

आणविक शक्तिलाई ‘राज्यको रक्षा क्षमताको मेरुदण्ड’ को रूपमा वर्णन गर्दै केसीएनएले भनेको छ, “प्रजातान्त्रिक गणतन्त्र कोरियाले देश र जनताको सुरक्षामा गम्भीर खतरा उत्पन्न गर्ने बाह्य आक्रमण र आक्रमणको सामना गर्न अन्तिम माध्यमको रूपमा आणविक हतियारको प्रयोग गर्ने आफ्नो मुख्य सिद्धान्तको रूपमा लिनेछ ।”