काठमाडौँ – आज २०७९ साल भदौ २४ गते शुक्रबार । सन् २०२२ को सेप्टेम्बर ९ तारिख । आजको दिन इतिहासमा भएका केही महत्त्वपूर्ण घटनाक्रम यस्ता छन् :

सन् २०१५ सेप्टेम्बर ९ मा महारानी एलिजाबेथ द्वितीय सबैभन्दा लामो शासन गर्ने बेलायती शासक बनेकी थिइन् । रानी भिक्टोरियाको ६३ वर्ष, ७ महिना र २ दिन शासन गरेको कीर्तिमान तोड्दै महारानी एलिजाबेथ बेलायतको सर्वाधिक लामो शासन गर्ने रानी बनेकी थिइन् ।

सन् २००१ सेप्टेम्बर ९ मा जकार्तास्थित अष्ट्रेलियाली राजदूतावास बाहिर कार बम विस्फोट हुँदा १० जनाको मृत्यु भएको थियो ।

सन् १९९३ सेप्टेम्बर ९ मा प्यालेस्टाइन लिबरेसन अर्गनाइजेसन पीएलओले इजरायललाई वैध राज्यको औपचारिक मान्यता दिएको थियो ।

सन् १९९१ सेप्टेम्बर ९ मा सोभियत संघको अधिनबाट ताजिकिस्तानले स्वतन्त्रता घोषणा गरेको थियो । सन् १९९१ मा सोभियत संघ पतन भएसँगै ताजिकिस्तानले स्वतन्त्रता प्राप्त गरेको थियो ।

सन् १९४८ सेप्टेम्बर ९ मा किम इल सुङले उत्तर कोरियाको स्थापना गरेका थिए । दोस्रो विश्वयुद्धमा पूर्वी एसियामा जापानको पराजयसँगै सोभियत संघको सहयोगमा किम इल सुङले कोरियाली प्रायद्विपमा प्रजातान्त्रिक जनगणतन्त्र स्थापना गरेका थिए ।

सन् १८९० सेप्टेम्बर ९ मा ‘केएफसी’ का संस्थापक र अमेरिकी व्यापारी कर्नल स्यान्डर्सको जन्म भएको थियो । सन् १९८० डिसेम्बर १६ मा ल्यूकेमिया रोगका कारण स्यान्डर्सको ९० वर्षको उमेरमा मृत्यु भएको थियो ।