काठमाडौँ– बतास समूहलाई नेपाल–भारत मैत्री पशुपति धर्मशाला भवन छाड्न पशुपति क्षेत्र विकास कोषले एक साताको अल्टिमेटम दिएको छ ।

कोषका सदस्यसचिव मिलनकुमार थापाद्वारा बतास समूहअर्न्तगतको होटल आनन्दलाई बुधबार पत्र पठाएर जेठ मसान्तभित्र धर्मशाला खाली गरेर साँचो बुझाउन भनिएको हो ।

नेपाल–भारत मैत्री पशुपति धर्मशाला भवन छाड्न पशुपति क्षेत्र विकास कोषले यस्तो निर्णय सुनाएको हो ।

बतास समूहको होटल आनन्दलाई चैतमा नै सम्झौता रद्द गर्न भनिएको हो । तर, यो निर्णयपछि बतास समूह काठमाडौँ जिल्ला अदालत पुगेको थियो ।

यसअघि वि.सं. २०७६ जेठ १ गते करार सम्झौता गरेर कोषले धर्मशाला भाडामा दिने निर्णय गरेको थियो । उक्त करार सम्झौता उल्लङ्घन भएको भन्दै वि.सं. २०७८ चैत्र १४ मा रद्द गरिएको थियो । त्यसपछि बतास समूह अदालत पुगेको थियो ।

अदालतले होटल सञ्चालन गर्न बतास समूहलाई अवरोध नगर्न अन्तरकालीन आदेश दिएको थियो ।

उक्त अन्तरकालीन आदेशविरुद्ध कोषले दिएको निवेदनको सुनुवाइ गर्दै आज न्यायाधीश कोष र बतास समूहबीचको करार भङ्ग भइसकेकाले पुनःहोटल सञ्चालन गर्न दिनु कानुनबमोजिम नहुने उल्लेख गर्दैै अन्तरकालीन आदेश बदर गरिदिएको थियो ।