काठमाडौँ– दर्शकले महानायकको ट्याग दिएका अभिनेता राजेश हमाल आज जन्मोत्सव मनाउँदैछन् । उनलाई सामाजिक सञ्जालमा फ्यान देखि दर्शकसम्मले शुभकामना दिइरहेका छन् । उमेरलाई अंकको रुपमा मात्र बुझ्न आग्रह गर्ने हमालको जन्म २०२१ साल जेठ २६ गते भएको हो । आफूलाई सँधै युवा भन्न रुचाउने हमालले २०४६ सालमा अभिनेताको रुपमा डेब्यु गरे । त्यस अगाडि उनको पहिचान मोडलको रुपमा स्थापित थियो । उनले साइनोमा आफ्नै मामा पर्ने दीपक रायमाझीको फिल्म ‘युग देखि युगसम्म’ मार्फत २०४६ सालमा डेब्यु गरेका हुन् । 

उनको जीवनमा अर्को महत्वपूर्ण डेट बन्यो २०७१ साल । किनकी यो वर्ष उनले एउटा प्रश्नको अन्त्य गरे, ‘विवाह कहिले गर्ने ?’ उनले प्रेमिका मधु भट्टराईसँग विवाह गरे । २ सय भन्दा बढी फिल्ममा अभिनय गरेका अभिनेता हमालले पछिल्लो समय भने टेलिभिजन, म्युजिक भिडियो, विज्ञापन र स्टेज शो मा व्यस्त छन् । दुई दशक अगाडि अनुहार बिक्ने हिरोको रुपमा परिचित हमालले पछिल्लो समय फिल्म भने गरिरहेका छैनन् । उनले कमब्याक गर्ने भनिएको फिल्म ‘बागमती’ असफल रह्यो । त्यसपछि फिल्मबाट टाढिएका अभिनेता हमालले ‘सत्यम’ मार्फत कमब्याकको योजना बनाए । यद्यपि त्यो फिल्म अझै बन्ने नबन्ने टुङ्गो छैन । उनले रोहित कारण वैद्यको फिल्म ‘मायाको माया’ मा अभिनय गर्ने तय भएको छ । केही समयमै फिल्म छायांकनमा समेत जानेछ । 

झन्डै ८ वर्ष अगाडि अभिनेता हमालले मधुसँग विवाह गरेर एउटा प्रश्नको अन्त्य त गरे । यद्यपि अर्को प्रश्नको उदय भयो । ‘जुनियर हमाल’ कहिले आउँछन् ? उनलाई अहिले सर्वाधिक सोधिने प्रश्न नै यही हो । उनको बच्चा कहिले होला ? वा हुन्छ ? भन्ने प्रश्नको सामना केही वर्ष यता उनले गरिरहेका छन् । यस्तै उनले फिल्म मेकिङ्ग गर्ने भनेर अझै त्यसलाई मूर्तरूप दिन सकेका छैनन् । 

फिल्म निर्माण वा निर्देशनको विधामा सक्रिय हुने भनिएका हमालले अझै त्यसलाई मूर्तरूप दिएका छैनन् । आधिकांश फिल्मकर्मीले उनले यो समयमा फिल्म निर्माण वा निर्देशनमा आएको हेर्न चाहेका छन् । यद्यपि त्यो अझै सम्भव देखिएको छैन ।