काठमाडौं- युक्रेनमा रुसी आक्रमणपछि अस्थायी रूपमा पोल्याण्डबाट गर्दै आएका आफ्ना कूटनीतिक कार्य पुनः राजधानी किभबाट गर्ने युरोपेली युनियन ईयूले जनाएको छ ।

ईयूका शीर्षस्थ पदाधिकारीले किभको भ्रमण गरेलगत्तै यस्तो भनाइ आएको हो । यसअघि युरोपेली आयोगकी अध्यक्ष उर्सुला भोन डेर लाइन र ईयूका विदेश मामिला प्रमुख जोसेफ बोरेलले किभको भ्रमण गरी युक्रेनी राष्ट्रपति भोलोदिमिर जेलेन्स्कीसँग भेटवार्ता गरेका थिए ।

ईयूको पछिल्लो कदमले युक्रेनी सरकारसँग ईयूको अन्तरक्रियालाई बढाउने र युक्रेनी नागरिकहरूलाई सहयोग गर्ने बोरेलले विश्वास व्यक्त गरेको समाचार संस्था रोयटर्सले जनाएको छ ।

युक्रेनमा रुसले २४ फेब्रुवरीमा हमला गरेपछि केही पश्चिमा देशहरुले आफ्ना कूटनीतिक नियोग बन्द गरेर कर्मचारीलाई स्वदेश बोलाएका थिए ।

पछिल्लो समय रुसले आफ्नो हमला पूर्वी युक्रेनमा केन्द्रित गरेको जनाएको छ ।