काठमाडौँ- भारतीय युवा व्यवसायी नीरज सिंहले नेपाली युवाहरुले व्यवसाय थालेमा भारतीय बजार सधैँ खुला रहने बताएका छन् । बिहीबार खबरहबले आयोजना गरेको युवा व्यवसायीहरूसँगको अन्तरक्रिया कार्यक्रममा बोल्दै भारतीय रक्षामन्त्री राजनाथ सिंहका छोरा युवा व्यवसायी सिंहले नेपाली युवाहरूका लागि भारतीय बजार खुला रहेको बताएका हुन् ।

उनले भारत आजको दिनमा बेलायतलाई पछाडि पार्दै अर्थतन्त्रमा धेरै अगाडि बढिसकेको भन्दै यसको सदुपयोग नेपाली युवा व्यवसायीले पनि गर्न सक्ने बताएका हुन् । साथै उनले युवाहरूलाई आफ्नो स्वतन्त्र रूपमा व्यवसायमा लाग्न अभिप्रेरित गरेका छन् ।

युवाहरूका लागि धेरै अवसर रहेको भन्दै उनले आफ्नो कम्पनी खोलेर युवाहरू नयाँ नयाँ सोचका साथ व्यवसायमा लाग्नुपर्ने बताए । यसका लागि नेपाल र भारत मिलेर केही नयाँ कुराको ‘एक्सप्लोर’ गर्न सक्ने पनि उनले बताए ।

कार्यक्रममा नेपाली युवा व्यवसायी, उद्योग वाणिज्य संघका प्रतिनिधि, जलवायु परिवर्तनका अभियन्ता लगायत व्यक्तित्वहरूको सहभागिता रहेको थियो ।