काठमाडौं– भारतको लद्दाखलाई बाँकी विश्वसँग जोड्ने रणनीतिक रुपमा अत्यन्त महत्वपूर्ण १३ किलोमिटर लामो जोजिला सुरुङको निर्माण कार्य चलिरहेको छ ।

मेगा इन्जिनियरिङ एण्ड इण्डिष्ट्रिज लिमिटेड नामक कम्पनीले यसको निर्माण गरिरहेको छ । कम्पनीले स्थानीय कश्मीरीहरुको सहभागितामा यो परियोजना अघि बढिरहेको जनाएको छ ।

भारतीय समाचार संस्था एएनआईका अनुसार यो परियोजनामा काम गर्ने १ हजार मध्ये ९ सय जना कामदार स्थानीय कश्मीरीहरू नै छन् ।

‘मैले धेरै मिहिनेतले यो काम सिकेको हुँ । हाइड्रोलिक रिगजस्ता भारी औजारको प्रयोग मेरा लागि धेरै गाह्रो काम होइन । सुरुङ खन्दा मलाई कुनै डर हुन्न ।’ बन्दिपोराका कामदार बाबा लतिफले एएनआईसँग भने ।

कामदारहरूसँग २० वर्षसम्म रेलमार्ग, सडकमार्ग, विद्युत लाइनजस्ता परियोजनामा काम गरेको अनुभव रहेको जनाइएको छ । परियोजनामा कार्यरत २ सयभन्दा धेरै इन्जिनियरहरु पनि स्थानीय नै छन् ।