काठमाडौं– केटान्जी ब्राउन ज्याक्सन अमेरिकी सर्वोच्च अदालतमा सेवा गर्ने प्रथम अश्वेत महिला बनेकी छिन् ।

अमेरिकाको माथिल्लो सदन सिनेटले उनलाई सर्वोच्च अदालतमा नियुक्त गर्ने राष्ट्रपति जो बाइडेनको प्रस्ताव पारित गरेसँगै उनी अमेरिकी इतिहासमै सर्वोच्च अदालतमा सेवा गर्ने प्रथम अश्वेत महिला बनेकी हुन् ।

उनलाई न्यायाधीश बनाउने प्रस्तावमा भएको ऐतिहासिक मतदानमा ५३ सिनेटरले उनको पक्षमा तथा ४७ सिनेटरले उनको विपक्षमा मतदान गरेको अमेरिकी सञ्चारमाध्यमले जनाएका छन् ।

अधिकांश रिपब्लिकन सिनेटरले उनको विपक्षमा मतदान गरेपनि मेइन राज्यको प्रतिनिधित्व गर्ने सिनेटर सुजन कोलिन्स, अलास्का राज्यकी रिपब्लिकन सिनेटर लिसा मुर्कोवोस्की र उटा राज्यका सिनेटर मिट रोम्नीले उनको पक्षमा मत दिएको न्यू योर्क टाइम्सले जनाएको छ ।

यससँगै ५१ वर्षीया ज्याक्सन सर्वोच्च अदालतमा सेवा गर्ने प्रथम अश्वेत महिला मात्रै नभएर समग्रमा तेश्रो अश्वेत अमेरिकी बन्न पुगेको जनाइएको छ ।