काठमाडौं– रुसी आक्रमणको सामना गरिरहेको युक्रेनलाई अष्ट्रेलियाले सैनिक बख्तरबन्द गाडी प्रदान गरेको छ । गत साता युक्रेनी राष्ट्रपति भोलोदिमिर जेलेन्स्कीले सैनिक सहयोग गर्न आग्रह गरेको जवाफमा अष्ट्रेलियाले २० बख्तरबन्द गाडी सहयोग गर्न लागेको हो ।

३० मध्ये ३ बुशमास्टर गाडी युक्रेन जाने क्रममा रहेको बीबीसीले जनाएको छ । यी सैनिक सवारी साधनलाई युरोपको अज्ञात स्थलबाट युक्रेनतर्फ आपूर्ति गरिने जनाइएको छ ।

युद्धमैदानमा सैनिक एवम् गैरसैनिक सर्वसाधारणलाई यताउता लैजान उच्च सुरक्षा व्यवस्था भएको बुशमास्टर गाडीले सहयोग गर्ने बीबीसीले जनाएको छ ।

हालसम्म अष्ट्रेलियाले युक्रेनका लागि १९ करोड अष्ट्रेलियन डलर बराबरका सैनिक एवम् मानवीय सहायताको घोषणा गरेको छ भने धेरै रुसी नागरिकमाथि प्रतिबन्धको घोषणा गरेको छ । त्यस्तै, रुसी तेल आयातमा पनि अष्ट्रेलियाले कटौती गर्ने घोषणा गरेको छ ।

गत साता जेलेन्स्कीले अष्ट्रेलियाको संसद्लाई सम्बोधन गर्दै अष्ट्रेलियालाई सहयोगका लागि धन्यवाद दिएका थिए । जवाफमा अष्ट्रेलियन प्रधानमन्त्री स्कट मोरिसनले रुसी आक्रमणविरुद्ध अष्ट्रेलियन जनता युक्रेनको साथमा रहेको बताएका थिए ।