काठमाडौं– युक्रेनमा जारी आक्रमणका क्रममा रुसी फौजले उल्लेखनीय हताहति व्यहोरेको रुसी प्रशासन क्रेमलिनले स्वीकार गरेको छ ।

बेलायती टेलिभिजन स्काई न्युजलाई दिएको अन्तरवार्तामा क्रेमलिनका प्रवक्ता दिमित्री पेस्कोभले युक्रेनमा जारी रुसी आक्रमणमा ‘उल्लेखनीय मात्रामा सैनिक गुमाएको’ स्वीकार गरेका हुन् ।

उनले यो क्षति ‘हाम्रा लागि ठूलो दुःखद घटना’ रहेको समेत बताए । आगामी दिनहरूमा रुसले युक्रेनमा सैनिक उद्देश्य प्राप्त गरेरै छाड्ने पनि उनको दृढता छ ।

उनले रुसी फौज पछि हटेसँगै युक्रेनी राजधानी किभ नजिकै रहेको बुचा शहरमा फेला परेका गैर सैनिकको आम हत्या तथा युद्ध अपराध घटनामा रुसी सैनिक जिम्मेवार नरहेको समेत बताए ।

सो क्षेत्रमा मारिएका गैरसैनिकका भिडियो र तस्वीरहरू मञ्चन गरिएको भन्दै उनले भने, ‘हामी दुष्प्रचार र झूठका दिनहरूमा बाँचिरहेका छौँ ।’

क्रेमलिनले रुसले भन्ने गरेको ‘युक्रेनमा विशेष सैनिक कारवाही’ मा आफ्नो तर्फबाट न्यून मात्रै क्षति भएको बताउने गरेको थियो ।

यद्यपि पेस्कोभको पछिल्लो स्वीकारोक्तिले युक्रेनमा जारी आक्रमणका कारण रुसी फौजले भारी मात्रामा क्षति व्यहोरेको युक्रेनी दाबीलाई बल पुगेको अन्तर्राष्ट्रिय सञ्चारमाध्यमले जनाएका छन् ।