काठमाडौँ – नेपाल बार एसोसिएसनको अध्यक्षमा गोपालकृष्ण घिमिरे निर्वाचित भएका छन् ।

१४ सय मत गणना गर्न बाँकी छँदै उनी अध्यक्षमा निर्वाचित भएका हुन् । तर मतगणना सकिएपछि मात्रै आधिकारिक घोषणा हुनेछ ।

यो समाचार तयार पार्दासम्म बृहत् लोकतान्त्रिक प्रगतिशील समावेशी तथा पेसागत कानुन व्यवसायी समूहको तर्फबाट अध्यक्षका उम्मेदवार बनेका घिमिरेले ३ हजार ७ सय २८ मत प्राप्त गरेका छन् ।

उनका प्रतिस्पर्धी प्रगतिशील तथा पेसागत कानुन व्यवसायी समूहका अध्यक्षका उम्मेदवार विष्णुमणि अधिकारीले १ हजार ९ सय ७७ मत पाए। अब गणना गर्न बाँकी मतअघि नै घिमिरेको जित सुनिश्चित भएको हो ।

पदाधिकारीमा पनि शुक्रबार बिहानसम्म घिमिरे समूहकै अग्रता रहेको छ । महासचिवमा अञ्जिता खनालले ३१७५ मत प्राप्त गरेकी छन्। अर्का उम्मेदवार केदारप्रसाद कोइराला २३४५ पाएका छन्।

कोषाध्यक्षमा भरतबहादुर राउतले ३४७५ मत पाएका छन् भने उनका प्रतिद्वन्द्वी जगतबहादुर कार्कीले २१८८ मत पाएका छन्।

१९ चैतमा अध्यक्षसहित २५ सदस्यीय कार्यसमितिका लागि भएको निर्वाचनमा ७४२९ मत खसेको थियो । मतगणना मङ्गलबार बिहानदेखि सुरु भएको थियो।