काठमाडौं– गएको फेब्रुअरी २४ देखि रुसले युक्रेनमाथि सैनिक आक्रमण गरिरहेको छ । रुसी आक्रमणबाट देशलाई जोगाउन युक्रेनी सेनामात्रै नभई सर्वसाधारण पनि युद्धमैदानमा उत्रिएका छन् ।

आक्रमणकारीबाट आफ्नो देश जोगाउन चाहने युक्रेनी सर्वसाधारणका लागि युक्रेनी फौजले ‘क्षेत्रीय रक्षा दल’ मा भर्ना हुन आह्वान पनि गरेको छ । यही क्षेत्रीय रक्षा दलमा सहभागी एक जोडीले राजधानी किभ नजिकै युद्धमैदानको अग्रमोर्चामै विवाह गरेका छन् ।

राजधानी किभ शहरका मेयर भिताली क्लित्स्कोले ट्विटरमार्फत् भिडियो जारी गर्दै युद्धको अग्रमोर्चामा सैनिकको जोडीले विवाह गरेको जनाएका हुन् ।

उनले सार्वजनिक गरेको भिडियोमा एक जना सैनिकले उनीहरुको विवाह उपक्रम सम्पन्न गरेको देख्न सकिन्छ ।

त्यसपछि नवविवाहित जोडीले चुम्बन गरी फूलको बुके साटासाट गरेको देख्न सकिन्छ । लगत्तै त्यहाँ उपस्थित अरु सैनिकहरुले ताली बजाएर विवाह सम्पन्न गर्छन् ।

भिडियोमा मेयर क्लित्स्को पनि समारोहमा उपस्थित भइ नवदम्पतीलाई बधाई दिएको देख्न सकिन्छ ।

यो जोडी २२ वर्षदेखि सँगै रहेको र उनीहरूबाट एक छोरी पनि भइसकेको एबीसीको समाचारमा उल्लेख छ ।