काठमाडौँ – विश्व फुटबलको सर्वोच्च निकाय फिफाले लियोनल मेस्सी, रोबर्टो लेवान्डोस्की र मोहमद सलाह ‘द बेस्ट फिफा पुरुष वर्ष खेलाडी’ अवार्डका लागि अन्तिम तीन खेलाडीमा मनोनित परेको जनाएको छ ।

फिफाले शुक्रबार सार्वजनिक गरेको अवार्ड अन्तर्गत ‘वर्ष पुरुष खेलाडी’का लागि अन्तिम तीन खेलाडीको नाम सार्वजनिक गरेको हो । फिफाले विजेताको नाम १७ जनवरीमा घोषणा गर्नेछ ।

वर्ष खेलाडी महिलातर्फ साम केर, जेनिफर हेर्मोसो र एलेक्सिया पुटेलास परेका छन् । महिला प्रशिक्षकतर्फ लुइस कोर्टेस, एम्मा हाएस र सरिना विग्मान पर्दा वर्ष पुरुष प्रशिक्षकको अन्तिम मनोनयनमा पेप ग्वार्डीवाला, रोबर्टो मान्सिनी र थोमस टुचेल रहेका छन् ।

वर्ष गोलकिपर अवार्डका लागि म्यानुएल नुएर, इडुवार्ड मेन्डी र जियानलुगी डोनारुम्मा परेका भने वर्ष उत्कृष्ट गोल पुस्कास अवार्डका लागि एरिक लामेला, प्याट्रिक सिच र मेहदी तारेमी शीर्ष तीनमा परेका छन् ।