काठमाडौं – स्वीट्जरल्यान्डलाई भारी गोल अन्तरले पराजित गर्दै पोर्चुगल विश्वकप फुटबलको क्वाटरफाइनलमा प्रवेश गरेको छ ।

मंगलबार राति लुसिल स्टेडियममा स्वीट्जरल्यान्डलाई ६–१ गोल अन्तरले पराजित गर्दै पोर्चुगल क्वाटरफाइनल प्रवेश गरेको हो ।

पोर्चुगलका लागि गोन्कालो रामोसले ह्याट्रिक पूरा गरे । थप गोल पेपे, राफायल गुइरेरो र राफायल लियो गरेका थिए । स्वीट्जरल्यान्डका मानुएल एकान्जीले सान्तवना गोल फर्काए ।

खेलको १७ औं मिनेटमा रामोसले पोर्चुगललाई सुरुवाती अग्रता दिलाएका थिए । ३३ मिनेटमा पेपेले गोल गर्दै अग्रता दोब्बर बनाए ।

दोस्रो हाफको सुरुवाती अवस्था अर्थात् खेलको ५१ औं मिनेटमा रामोसले व्यक्तिगत दोस्रो गोल गरे भने
५५ औं मिनेटमा राफायलले गोल गर्दै खेलमा ४ शून्यको अग्रता बनाए ।

स्वीट्जरल्यान्डका लागि खेलको ५८ औं मिनेटमा एकान्जीले शान्तवना गोल गरेका हुन् । तर, त्यसको १० मिनेटमा गोल गर्दै रामोसले ह्याट्रिक पूरा गरे ।

पोर्चुगलका लागि इन्जुरी समयमा लियोले गोल गर्दै ६–१ को शानदार जित निश्चित गरेका हुन् । पोर्चुगलले अब क्वाटरफाइनलमा मोरक्कोसँग खेल्नेछ । गएराति नै भएको खेलमा स्पेनलाई पराजित गर्दै मोरक्को अन्तिम आठमा पुगिसकेको छ ।