काठमाडौँ– अभिनेता सरोज खनालले ‘बगान’ मार्फत निर्देशनमा डेब्यु गर्दैछन् । उनको फिल्म छायांकन भएर पोष्ट प्रोडक्सनमा रहेको छ । फिल्म अमेरिकाको विभिन्न सहरमा प्रदर्शन गरेपश्चात् नेपालमा प्रदर्शन गर्ने उनको तयारी छ । फिल्मको बारेमा जानकारी दिन आयोजित समारोहमा निर्देशन बनेका सरोज खनालले आफूमा अन्य निर्देशकको बिम्ब आउने बताए । 

‘मैले काम गर्दै गर्दा कतै शोभित बस्नेत त कतै नरेश पौड्याल पाउनु हुनेछ । किनकी म कलाकार सरोज खनाललाई हावी हुन् दिन्न चाहन्थेँ’ सरोजले भने । उनले आफूले डेब्यु निर्देशकीय फिल्ममा नीर शाह, बसुन्धरा भुषाल, करिश्मा मानन्धर जस्ता अग्रज कलाकारहरुसँग काम गरेकोमा भाग्यमानी महसुस गरेको बताए । ‘मैले अभिनयका धुरन्धर अनुहारलाई एक्सन र कट भन्ने मौका पाए । निकै उत्साहित छु’ उनले भने । फिल्ममा उनले पनि सानो भूमिकामा अभिनय गरेका छन् । यद्यपि त्यो उनको चाहना थिएन । उनले त्यो भूमिका निर्वाह गरिदिन भुवन केसीलाई अफर गरेका थिए । तर, अभिनेता केसीले मानेनन् ।

‘फिल्ममा मैले एउटा क्यारेक्टर गरेको छु । जुन म गर्न चाहन्न थिएँ । मैले भुवन केसी दाइलाई त्यो क्यारेक्टरको अफर गरेको थिएँ । मलाई अलि बुढो खालको हिरो चाहिएको थियो । तर, भुवन दाइले ममाथि विश्वास गर्नुभएन कि क्या हो दुईटा मात्र सिन के गर्नु भन्नु भएपछि म आफैँले अभिनय गरेको हुँ’ सरोजले भने । उनले आफूलाई अलिक बूढो क्यारेक्टरको अभिनेता चाहिएकोले भुवनलाई अफर गरेको समेत बताए । ‘फिल्म हेरेपछि भुवन दाइलाई दुईटा सिनको क्यारेक्टर नगरेकोमा पछुतो हुनेछु’ अभिनेता खनालले भने ।