जनकपुरधाम– नेकपा माओवादी केन्द्रका अध्यक्ष पुष्पकमल दाहालले अब सदन खुल्लासाथै नागरिकतासम्बन्धी विधेयक पास गर्ने बताएका छन् ।

पाँच दलीय गठबन्धनद्वारा जनकपुरमा आज अयोजित चुनावी सभालाई सम्बोधन गर्दै उनले यस्तो बताएका हुन् ।

कार्यक्रममा उनले मधेशका धेरैमा मानिस नागरिकतासम्बन्धी समस्याबाट गुज्रिरहेको र उक्त समस्या समाधानका लागि संविधान संशोधनको पक्षमा आफू पनि रहेको बताए । उनले यसअघिको सरकारले नागरिकतासम्बन्धी विधेयक पास गर्न नदिएको पनि आरोप लगाए ।

सभाअघि भएको र्‍यालीमा प्रचण्ड, जसपा अध्यक्ष उपेन्द्र यादव, जनकपुरधामका मेयर उम्मेदवार लालकिशोर साहसहित गठबन्धनका नेताहरू सहभागी भएका थिए ।

यता, नागरिकताबाट बञ्जित युवाहरूले भने गठबन्धनको सरकारले सदनमा नेकपा एमालेको विरोधका बाबजुद अन्य विधेयकहरू पारित गरेको भए पनि नागरिकता विधेयक पारित गर्न चासो नदेखाएको आरोप लगाउँदै आएका छन् ।