काठमाडौं– अमेरिकाले रुसी ह्याकिङ समूहबारे गोप्य सूचना दिनेलाई डेढ करोड इनाम घोषणा गरेको छ ।

अमेरिकी रक्षा मन्त्रालयका प्रवक्ता नेड प्राइसले ‘कोन्टी’ भनिने रुसी साइबर आक्रमणकारीको समूहबारे गोप्य सूचना दिनेलाई १ करोड ५० लाख डलर इनाम घोषणा गरेका हुन् ।

अन्तर्राष्ट्रिय समाचार संस्था रोयटर्सका अनुसार यस समूहका नाइकेको स्थानबारे जानकारी दिनेलाई १ करोडको इनाम राखिएको छ । त्यस्तै, यस समूहका सदस्यलाई पक्राउ गर्न सूचना दिनेलाई ५० लाख डलरको इनाम घोषणा गरिएको रोयटर्सले जनाएको छ ।

‘यो इनाम घोषणा गरेबाट फिरौती माग्न साइबर अपराधीहरूले गर्ने आक्रमणबाट विश्वभरका सम्भावित पीडितहरूलाई बचाउन अमेरिकाको प्रतिबद्धता स्पष्ट हुन्छ ।’ प्राइसलाई उद्धृत गर्दै रोयटर्सले जनाएको छ ।

यो ह्याकिङ समूहले कम्प्युटर सञ्जालमा आक्रमण गरेर फिरौती माग्ने गरेको बताइन्छ । गत वर्षमात्रै यो समूहले १६ आकस्मिक सेवा र चिकित्सकीय क्षेत्रमा साइबर आक्रमण गरेको अमेरिकाको संघीय जाँचबुझ ब्युरोले जनाएको छ ।

रोयटर्सले जनाएअनुसार ‘कोन्टी’ समूहले हालसम्म १ हजार भन्दा धेरैलाई निशाना बनाइसकेको छ । पीडितहरूबाट यो समूहले हालसम्म डेढ करोड डलर भन्दा धेरै फिरौती प्राप्त गरेको जनाइएको छ ।

यसबाहेक यही अप्रिल महिनामा ‘कोन्टी’ समूहले ल्याटिन अमेरिकी मुलुक कोष्टा रिकाको कर तथा भन्सार क्षेत्रलाई निशाना बनाउँदा त्यहाँको विदेशी व्यापार समेत प्रभावित भएको प्राइसले बताए ।

गत फेब्रुअरी महिनामा यो समूहले रुसका विरोधीहरुलाई लक्षित गरी आक्रमण गर्ने चेतावनी दिएको थियो ।