काठमाडौँ– नेपालमा प्रतिवन्धित लागु औषध गाँजालाई औषधीको रुपमा प्रयोग गर्न कानुनी रुपमै स्पष्ट रुपमा व्यवस्था गर्न लागिएको छ ।

गृह मन्त्रालयले औषधीय प्रयोजनका लागि गाँजा खेती गर्न मिल्ने गरी ६ कार्यविधि ल्याउने तयारी गरेको हो ।

गृह मन्त्रालयका प्रवक्ता फणिन्द्रमणी पोखरेलले अहिले पनि औषधीको रुपमा प्रयोग गर्न पाउने व्यवस्था भएपनि यसको खेतीलाई समेत व्यवस्थित गर्न कार्यविधि बनाउन लागिएको जानकारी दिए । तर कार्यविधि बनाउन पनि मन्त्रिपरिषद बैठकले स्वीकृति दिनुपर्ने मन्त्रालयका प्रवक्ता पोखरेलले बताए ।

उनका अनुसार अहिले मन्त्रालयको नीति योजना अनुगमन तथा मूल्यांकन महाशाखाले औषधीय प्रयोजनका लागि कार्यविधि बनाइरहेको छ । कार्यविधि अनुसार सरकारसँग अनुमति लिएर औषधीय प्रायोजनका लागि गाँजा खेती गर्न सकिने छ ।

कार्यविधि बने सबै किसानले खेति गर्न पाउँछन् भन्ने प्रश्नमा उनले भने, ‘जुनसकै किसानले त पाँउदैनन्, म फलानो कम्पनीको लागि, फलानो कामको लागि यसरी गर्छु भनेर अनुमति लिई गर्न सक्छन् । यसमा पनि रिसट्रक्सन हुन्छ, सबै व्यवस्था प्रयोजन खुलाई गर्न दिइने छ ।’

अमेरिका लगायत विकसित देशमा गाँजा प्रयोग गर्न पाउने कानुनी मान्यता भएपनि नेपालमा भने यो प्रतिवन्धित छ । यसअघि गाँजा औषधीको रुपमा प्रयोग हुने हुँदा यसको खेतीलाई कानुनी मान्यता दिए किसानको आम्दानीको स्रोत बन्ने भन्दै संसदमा समेत कुरा उठाइएको थियो ।