दोहा– कतारमा ओमिक्रोन भाइरस संक्रमण ह्वात्तै बढेर पीसीआर परीक्षण गर्ने भीड बढेसँगै यहाँको लुसेलमा ड्राइभ थ्रु पीसीआर परीक्षण केन्द्र खुलेको छ ।

कतारको स्वास्थ्य मन्त्रालयका अनुसार बिहीबार लुसेल खेलकुद कम्प्लेक्सनजिकै एउटा ड्राइभ-थ्रु कोभिड-१९ परीक्षण केन्द्र खोलिएको जनाएको छ ।

भिड निकै बढेपछि र विदेश यात्रा गर्नुपर्नेले बेलैमा रिपोर्ट पाउन नसक्दा कैयनले उड्न नपाएपछि बिहिबार अपरान्ह ४ बजे देखि लुसेलमा १० लेनको ड्राइभ थ्रु पीसीआर परीक्षण सुविधा उपलब्ध गराइएको मन्त्रालयले जनाएको छ ।

हरेक दिन बिहान ८ बजेदेखि राति १० बजेसम्म परीक्षण गरिने यो सुविधा केन्द्रमा दैनिक ५ हजार जनाको पीसीआर गर्ने बताइएको छ । कतार सरकारले पीसीआर परीक्षण माग र चाप रहुञ्जेल यो सुविधा जारी राख्ने जनाएको छ ।

केन्द्रमा अन्तिम प्रवेश बेलुकीको ९ बजे हुनेछ। कार नभएकाहरूले ट्याक्सीमा केन्द्रमा जान सक्नेछन् । कतारी आइडी, हेल्थ कार्ड र एह्तरेज एप अनिवार्य हुनु पर्नेछ । केन्द्रमा जाने सबै आगन्तुकहरूलाई मास्क पनि अनिवार्य लगाउनु पर्नेछ ।

संक्रमण बढेको बढै एकै दिन तीन हजार नजिक

मन्त्रालयका अनुसार बिहीवार २७७९ नयाँ संक्रमित थपिएका छन् । तीमध्ये २०५३ समुदायभित्रकै संक्रमित हुन् भने ७२६ विदेशबाट फर्केका यात्रु हुन् । योसँगै कतारमा संक्रमितको संख्या २ लाख ६० हजार २८३ पुगेको छ ।

पछिल्लो २४ घण्टामा कतारमा ३१७ जना संक्रिमत निको भएका छन् । योसँगै निको हुनेको संख्या पनि २ लाख ४६ हजार ७८४ पुगेको मन्त्रालयले जनाएको छ । हालसम्म कतारमा ६१८ जनाले कोभिड संक्रमणबाट ज्यान गुमाइसकेका छन्।

यो समाचार तयार पार्दासम्म कतारमा सक्रिय संक्रमितको संख्या १२ हजार ८८१ रहेको छ भने ४३२ जना यहाँको विभिन्न अस्पतालमा उपचार गराइरहेका छन् । तीमध्ये ४२ जनाको आईसीयुमा उपचार भइरहेको छ ।

–योगेन्द्र योगी