काठमाडौं– हुण्डीको कारोबार गर्ने एकजनालाई स्रोत नखुलेको रकमसहित प्रहरीले पक्राउ गरेको छ ।

हुण्डीको कारोबार भइरहेको भन्ने गोप्य सूचनाका आधारमा प्रहरीले बारा पचरौता नगरपालिका घर भई हाल काठमाडौं १३ कालिमाटी बस्ने ५४ वर्षीय जय कमल साह कलवारलाई पक्राउ गरेको हो ।

काठमाडौं उपत्यका अपराध अनुसन्धान कार्यालयबाट खटिएको विशेष प्रहरी टोलीले उनलाई काठमाडौंको कालिमाटीस्थित टंकेश्वरबाट पक्राउ गरेको हो ।

उनको साथबाट स्रोत नखुलेको १७ लाख ६६ हजार ३ सय नेपाली रुपैयाँ र १२ लाख ८ हजार ७ सय भारतीय रुपैयाँ गरी कूल ३७ लाख २ सय २० नेपाली रुपैयाँ बरामद गरिएको प्रहरीले जनाएको छ ।

पक्राउ परेका कलवारलाई थप अनुसन्धान एवम कारवाहीका लागि राजश्व अनुसन्धान विभाग हरिहरभवन ललितपुर पठाइएको छ ।