काठमाडौं– उत्तर कोरियाले क्षेप्यास्त्र परीक्षण गरेको जवाफस्वरुप अमेरिका र दक्षिण कोरियाले पनि क्षेस्यास्त्र परीक्षण गरेका छन् । सोमबार अमेरिकी एवम् दक्षिण कोरियाली सेनाले ८ वटा ब्यालेस्टिक क्षेप्यास्त्र परीक्षण गरेको बीबीसीले जनाएको छ ।

सोमबार सबेरै अमेरिका र दक्षिण कोरियाका सेनाले जमिनबाट जमिनमा मार हान्न सक्ने आर्मी ट्याक्टिकल मिसाइल सिस्टम्सको परीक्षण गरेको हो । परीक्षण गरिएका आठ क्षेप्यास्त्रमध्ये सातवटा दक्षिण कोरियाली तथा एक अमेरिकी रहेको बीबीसीले जनाएको छ ।

अमेरिका र दक्षिण कोरियाले नियमित रुपमा कोरियाली प्रायद्विपमा सैनिक अभ्यास गर्दै आएका छन् । यस्ता सैनिक अभ्यासप्रति उत्तर कोरियाले क्रुद्ध प्रतिक्रियाहरु जनाउने गरेको छ ।

यी दुई साझेदारले यसअघि उत्तर कोरियाले क्षेप्यास्त्र परीक्षण गरेको बेला पनि जवाफस्वरुप क्षेप्यास्त्र प्रहार गरी सैनिक अभ्यास गरेका थिए ।

गत महिनामा सत्ता सम्हालेका दक्षिण कोरियाली राष्ट्रपति युन सुक योलले उत्तर कोरियाविरुद्ध अझ सशक्त हुने संकेत देखाइरहेका बेला पछिल्लो घटनाक्रम विकास भएको हो ।

उनले आफ्नो उत्तरी छिमेकीले सरकारले कुनै भड्काउने कार्य गरेको खण्डमा आफ्नो सरकारले जवाफ दिने चेतावनी दिएका छन् । ‘हाम्रा जनताको जीवन र सम्पत्तिको रक्षा गर्न कुनै कमी नराख्नेमा हामी विश्वस्त छौँ ।’ उनलाई उद्धृत गर्दै बीबीसीले जनाएको छ ।