काठमाडौँ– प्रधानमन्त्री शेरबहादुर देउवाले बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक) मा आर्थिक साझेदारी प्रवर्द्धन गर्न र चुनौतीहरूलाई सम्बोधन गर्न सदस्य राष्ट्रहरूबीच एकता, ऐक्यवद्धता र सहकार्य  हुनुपर्नेमा जोड दिएका छन् । 

बिमस्टेकको २५औं वार्षिकोत्सवको अवसरमा एक सन्देश जारी गर्दै प्रधानमन्त्री देउवाले उक्त कुरा बताएका हुन् । बिमस्टेक सदस्य राष्ट्रका जनता र सरकारलाई शुभकामना दिँदै उनले शान्ति, विकास र समृद्धिको क्षेत्रीय आकांक्षालाई पुरा गर्न सङ्गठनलाई सक्षम बनाउनु पर्ने समेत बताएका छन् । 

यस्तै, बिमस्टेकको २५औं वार्षिकोत्सवको अवसरमा परराष्ट्रमन्त्री डा। नारायण खड्काले छुट्टै सन्देश जारी गर्दै बिमस्टेक पुनर्जीवित गर्न राजनीतिक इच्छाशक्तिको आवश्यकता रहेको बताएका छन् । उनले शान्ति र समृद्धिको साझा लक्ष्य हासिल गर्न बिमस्टेक सम्झौताको समयमै र प्रभावकारी कार्यान्वयन सुनिश्चित गर्नुपर्नेमा जोड दिएका छन् ।