काठमाडौँ- दीपेन्द्र लामाको निर्देशनमा छायांकनरत फिल्म ‘२ नम्बरी’ मा रहेका कलाकारहरू सौगात मल्ल र दयाहाङ राईको लुक्स सार्वजनिक भएको छ । फिल्ममा दुई साथीको भूमिकामा छन् । पात्रको लुक्स पनि उस्तै देखिएको छ ।

यी दुई रहेको भिडियो र फोटो सार्वजनिक भएसँगै सामाजिक सञ्जाल र टिकटकमा भाइरल भइरहेको छ । फिल्मको पात्रलाई लुकाउन नसक्नु फिल्म निर्माताको कमजोरी हुँदै आएको छ ।

छायांकन सेटमा सर्व सुलभ रुपमा मोबाइल प्रयोग गर्न पाइने भएकाले पनि पात्रको लुक्स फिल्म आउँदासम्म नयाँ हुँदैन । सौगात र दयाको ग्याङस्टर लुक्सको हेयरस्टाइल देख्न सकिन्छ ।

कास्कीको ल्वाङ गाउँमा फिल्म छायांकन भइरहेको छ । छायांकनपछि निर्माण युनिट राजधानी फर्किने तयारीमा छ । फिल्ममा सौगात र दयासँगै उगेन छोदेन  र उपासनासिंह ठकुरीको मुख्य भूमिका छ । मित्रताको कथा पेश गर्ने फिल्म आगामी कात्तिक ४ गते रिलिजको तयारीमा छ । फिल्मका प्रस्तुतकर्ता किरण नेपाली हुन् ।