काठमाडौँ- बेलाबखतमा सेयर बाँडफाँडलाई लिएर निर्माता र हल प्रदर्शकबीच हुने मतभेद कोरोना भाइरस महामारी यता देखिएको छैन । नेपालमा हल र फिल्म दुबैलाई पुरानै लयमा फर्काउने भन्दै दुबै पक्ष सहकार्यका साथ अगाडी बढिरहेका छन् । यसैबीच आउँदो वर्ष अर्थात वैशाख १ देखि प्रदर्शनमा आउने फिल्ममा सेयर सम्बन्धी नयाँ नियम लागू भएको छ ।

नेपालमा प्रदर्शन हुने फिल्ममा आगामी वैशाख १ गतेदेखि कमाइको बाँडफाँड (सेयर) सम्बन्धी नयाँ निर्णय लागू हुने भएको हो । फिल्म प्रदर्शन भएको पहिलो साता प्रदर्शक र निर्माताबीच ५०/५० प्रतिशत  र दोस्रो साता पनि दुवै पक्षबीच ५०/५० प्रतिशत सेयर विभाजन हुने सहमति भएको छ, भने तेस्रो साता निर्माताले ३५ प्रतिशत सेयर पाउने भएका छन् ।

फिल्म वितरक अशोक शर्मा संयोजक रहेको प्रदर्शन विशेष कार्यदलले वैशाखदेखि लागू हुने गरि सेयर बाँडफाँट बारे प्रदर्शक, वितरक र निर्माताबीच सहमति भएको छ ।