उदयपुर– उदयपुरको बेलका नगरपालिका–३ बुद्धचोकमा भएको बालिका हत्याका आरोपीलाई प्रहरीले पक्राउ गरी सार्वजनिक गरेको छ ।

कोशी जनता माध्यमिक विद्यालयमा कक्षा १० मा अध्ययनरत वर्ष १६ की कविता सुनुवारको हत्यामा संलग्न भएको आरोपमा पक्राउ परेका भारतको सिक्किम राज्य बियुङ स्थायी घर भई उदयपुर बेलका–३ बस्ने बिनोद ढकाल र बेलका–३ की १७ की नाबालिकालाई जिल्ला प्रहरी कार्यालयले सार्वजनिक गरेको हो ।

जिल्ला प्रहरी कार्यालय उदयपुुरले बुधबार पत्रकार सम्मेलन गरी हत्यामा संलग्नलाई सार्वजनिक गर्नुका साथै बालिकाको हत्या भएको सूचना पाएको दुई घण्टाभित्र हत्यामा संलग्नहरूलाई पक्राउ गर्न उदयपुर प्रहरी सफल भएको जनाएको छ ।

सार्वजनिक गरिएका आरोपी ढकाललाई ७ दिन र नाबालिकालाई उदयपुर जिल्ला अदालतबाट ५ दिनको म्याद लिएर थप अनुसन्धान सुरु गरेको जिल्ला प्रहरी प्रमुख प्रहरी उपरीक्षक सुवासचन्द्र बोहोराले जानकारी दिएका छन् ।

सुनुवारलाई ढकाल र नाबालिकाले योजनाबद्ध ढंगले बियरको बोतल र ढुंङ्गाले किचेर हत्या गरेको खुल्न आएको छ । विद्यालयमा भएको सामान्य झगडाको रिसिइबीका कारणले आरोपी नाबालिकाले नाताले दाजु पर्ने ढकालको सहयोग लिएर हत्या गरेको प्रहरीले जनाएको छ ।

यस्तै उदयपुरका राजनीतिक दल एवम् विभिन्न संघ संस्था तथा अधिकारकर्मीहरूले कविता सुनुवार हत्याको सत्य तथ्य छानबिन गरी दोषीलाई हदैसम्मको कारबाहीको माग गरेका छन ।