काठमाडौं– नियुक्त भएको २४ घण्टा नपुग्दै अर्थमन्त्रीले राजीनामा दिएपछि श्रीलंकामा नयाँ अर्थमन्त्री नियुक्त गर्ने कसरत तीव्र भएको छ । श्रीलंकाबाट प्रकाशित हुने अखबार डेली मिररको अनलाइन संस्करणले जनाएअनुसार बण्डुला गुणवर्देनालाई नयाँ अर्थमन्त्रीका रुपमा सिफारिस गरिएको छ ।

स्रोतलाई उद्धृत गर्दै उक्त अखबारले जनाएअनुसार उनलाई नयाँ अर्थमन्त्री नियुक्त गर्नेबारे छलफल भइरहेको छ ।

यसअघि अर्थमन्त्रीमा नियुक्त भएको २४ घण्टा नबित्दै अली सबरीले राजीनामा दिएका थिए । राष्ट्रपति गोताबाया राजपाक्षेका भतिज समेत रहेका बासिल राजपाक्षेले अरु २५ मन्त्रीहरुसहित सामूहिक राजीनामा दिएपछि सबरीलाई अर्थमन्त्री नियुक्त गरिएको थियो ।

पछिल्लो समय चरम आर्थिक संकटबाट गुज्रिरहेको श्रीलंकामा अर्थमन्त्रीको पद सम्हाल्न धेरै नेताहरुले आनाकानी गरिरहेको जनाइएको छ ।