काठमाडौँ – राष्ट्रिय खेलकुद परिषद् (राखेप)का सदस्य सचिव टंकलाल घिसिङले जिम्मेवारी सम्हालेका छन् ।

राखेपको सदस्य सचिवको विवाद समाप्त भएसँगै बुधबार राखेपमा फर्किएका घिसिङले आफ्नो कामकाज सुरु गरेका हुन् । सर्वोच्च अदालतले मंगलबार तत्कालीन राखेपका सदस्य सचिव रमेशकुमार सिलवालले आफूलाई बर्खास्त गरेको भन्दै सरकारविरुद्ध दायर गरेको रिट निवेदन सर्वाेच्च अदालतले खारेज गरेपछि सदस्य सचिवको विवाद समाप्त भएको हो ।

राखेपमा फर्केपछि घिसिङले चालु आर्थिक वर्षभित्र राष्ट्रिय खेलकुद आयोजनाको निम्ति प्रयास गर्ने बताए । उनले राष्ट्रिय खेलकुदका लागि वैशाख ३० गतेसम्मको समयलाई दूरदर्शी योजना तयार गर्न उपयोग गर्ने उनको भनाइ छ ।

त्यस्तै उनले अन्तर्राष्ट्रिय प्रतियोगितामा नेपालको सहभागिता बढाउन आवश्यक ट्रेनिङको व्यवस्था हुनुपर्नेमा जोड दिए । उनले समग्र खेलकुदको विकासका लागि सातै प्रदेशसँग छलफल गर्ने पनि बताए ।

युवा तथा खेलकुदमन्त्री महेश्वर जङ्ग गहतराजले खेलकुद विकास ऐन, २०७७ अनुसार सदस्यसचिवको बर्खास्ती र नियुक्ति गरेका थिए ।