काठमाडौं– टेस्ला कम्पनीका प्रमुख इलन मस्कले सामाजिक सञ्जाल ट्विटरको ९.२ प्रतिशत शेयर खरिद गरेका छन् । बीबीसीले जनाएअनुसार मार्च १४ मा टेस्ला कम्पनीका प्रमुख कार्यकारी मस्कको नाममा ट्विटरका ७ करोड ३४ लाख ८६ हजार ९ सय ३८ कित्ता शेयर छन् ।

यसअनुसार शुक्रबार बजार बन्द हुनुअघि ट्विटरको शेयर मूल्यका आधारमा मस्कको स्वामित्वमा रहेको शेयरको मूल्य २ अर्ब ८९ करोड रहेको जनाइएको छ ।

योसँगै मस्क ट्विटरमा सबैभन्दा धेरै शेयर रहेका लगानीकर्ता भएका छन् । ट्विटरका संस्थापक ज्याक डोर्सीको ट्विटरमा स्वामित्व केबल २.२५ प्रतिशत छ ।

८ करोड फलोअर्स रहेका मस्क ट्विटरमा निकै सक्रिय छन् । उनले बेलाबेला ट्विटरको आलोचना समेत गर्दै आएका छन् । गत महिनाको अन्त्यतिर मस्कले ट्विट गर्दै आफ्ना फलोअर्सलाई ट्विटरले वाक् स्वतन्त्रताका सिद्धान्त कार्यान्वयन गरेको वा नगरेको भनी सोधेका थिए ।

उनले ‘पोल’ गर्दै लेखेका थिए– ‘वाक् स्वतन्त्रता गतिशील लोकतन्त्रका लागि अत्यावश्यक छ । के तपाईँहरूलाई ट्विटरले यसका सिद्धान्त कडाइका साथ पालना गरेको विश्वास लाग्छ ?’

मस्कको पोलमा अधिकांशले लाग्दैन वा छैन भन्ने जवाफ दिएका थिए । यससँगै मस्कले कुनै नयाँ सामाजिक सञ्जाल खोल्ने वा ट्विटर नै खरिद गर्ने हल्ला थियो ।