काठमाडौँ- गत सोमबार सम्पन्न नेपाल अन्तर्राष्ट्रिय फिल्म फेस्टिभल (निफ) मा मोहन राई निर्देशित फिल्म ‘महानगर’ ले ह्याट्रिक गरेको छ । 

फिल्मबाट निर्देशक मोहन राईले लेखन र निर्देशन विधाका दुई अवार्ड पाएका थिए भने फिल्मबाट मेनुका प्रधानले उत्कृष्ट अभिनेत्रीको अवार्ड जितिन् । नेसनल फिचर विधा तर्फ प्रतिस्पर्धी रहेको फिल्मले उत्कृष्ट फिल्मको पनि पुरस्कार हात पार्‍यो । 

फिचर फिल्म तर्फकै विधामा ‘चिसो एस्ट्रे’ ले दुई विधामा पुरस्कार जित्यो । फिल्मबाट दिव्य देवले अभिनेतामा र उज्जवल बस्ताकोटीले छायांकनमा पुरस्कार जित्न सफल भए । देशी विदेशी गरी विभिन्न १४ विधामा बाँडिएको महोत्सवमा डन किहोटे अवार्ड ‘साइलेन्स ट्री’ ले पायो । फैजल सयसलको निर्देशनमा बनेको फिल्मलाई जुरी मध्येका एक मञ्जु कुमार श्रेष्ठले विजेता घोषणा गरेका थिए ।  

नेसनल पानोरम अन्तर्गत सर्ट फिल्म तर्फको उत्कृष्ट निर्देशकको अवार्ड बच्चन व्यञ्जनकारले जिते भने फिल्म तर्फको अवार्ड ‘आइसक्रिम’ ले जित्यो । संगीता श्रेष्ठ निर्देशित फिल्मले यौन हिँसाको विषयलाई प्रस्तुत गरेको छ । 

कार्यक्रममा उत्कृष्ट अन्तर्राष्ट्रिय सर्ट फिल्मलाई दिइने बागमती अवार्ड भने ‘अल सिट’ ले पाएको छ । त्यस्तै, मन्जुश्री अवार्ड अन्तर्गतको उत्कृष्ट एनिमेडेट फिल्म अवार्ड साइमन फिलियोन, उत्कृष्ट डकुमेन्ट्रीको एके शेर्पा अवार्ड ‘गोर्खा गल्सर्’ का लागि विशाल रोका मगर र माउन्ट एभरेस्ट अवार्ड ‘आउट अफ थिन एयर’ ले पाएको छ । त्यस्तै उत्कृष्ट अन्तर्राष्ट्रिय फिचर फिल्मलाई दिइने गौतमबुद्ध अवार्ड ‘नो ग्राउन्ड विनिथ द फिट’ ले पाएको छ ।