काठमाडौँ- अफगानिस्तानमा शासन चलाइरहेको तालिबानले मुलुकको टखार प्रान्तमा दुई कमाण्डरसहित चार जना आईएस लडाकु मारिएको दाबी गरेको छ ।

तालिबानद्वारा सञ्चालित बख्तर समाचार संस्थाका अनुसार तालिबानको गरेको कारवाहीमा परी टखार प्रान्तको दस्ती काला जिल्लामा आईएस लडाकु मारिएका हुन् ।

तालिबानको २१७ ओमरी आर्मी कोरका कमाण्डर करी अनिमुल्लाह तायबले बख्तरलाई बताएअनुसार सुरक्षाकर्मीले आईएसका लडाकु लुकेर बसेको स्थान पत्ता लगाएका थिए ।

पछि सो स्थानमा विषेश कारवाही गरिएको बताइएको छ । कारवाहीका क्रममा आईएसका दुई जना कमाण्डरसहित चार जना आईएस लडाकु मारिएको करी अनिमुल्लाहलाई उद्धृत गर्दै बख्तरले जनाएको छ ।

यद्यपि आईएस लडाकु मारिएकोबारे तालिबानी दाबीको स्वतन्त्र पुष्टि भने हुन बाँकी रहेको अफगानिस्तानको खामाप्रेसले जनाएको छ ।