काठमाडौँ– नेपाली कांग्रेसका महामन्त्री गगन थापाले कांग्रेस नेतृत्वको सरकार बनेपछि ढङ्गका साथ काम गर्न नसके जनताले साथ छाड्ने बताएका छन् ।

कांग्रेस सोलुखुम्बु काठमाडौँ सम्पर्क समितिले शनिबार काठमाडौंमा आयोजना गरेको अन्तरक्रिया कार्यक्रममा थापाले आगामी निर्वाचनपछि कांग्रेस नेतृत्वमा सरकार बन्ने र कांग्रेस नेतृत्वको सरकारले काम गर्न नसके जनताले साथ छाड्ने बताएका हुन् ।

उनले निर्वाचन अघि कांग्रेसले जनतामाझ गरेका प्रतिवद्धताहरू सरकारमा पुगेपछि पुरा गर्नुपर्ने धारणा राखे । यसपटक जनताले आफूहरुलाई अन्तिम मौका दिने भन्दै उनले अन्तिम मौकाको सही तवरले सदुपयोग गर्नुपर्ने जिकिर गरे । थापाले बहुमतले गैरजिम्मेवार बनाउने अवस्था आउन नदिन सबै सजग हुनुपर्ने बताए ।

थापाले निर्वाचनको केही समयपछि परिणाम देखिने गरि काम गर्न नसके दुर्घटना हुने र यसको डर गठबन्धनका सबै नेताहरूलाई हुनुपर्ने उल्लेख गरे ।