काठमाडौँ– लिज ट्रस बेलायतको नयाँ प्रधानमन्त्री बनेकी छिन् । सत्तारुढ कन्जरभेटिभ पार्टीको नेतृत्व दौडमा निवर्तमान अर्थमन्त्री ऋषि सुनकलाई पछि पार्दै निवर्तमान विदेशमन्त्री ट्रस नयाँ प्रधानमन्त्री बन्न सफल भएकी हुन् ।

कन्जरभेटिभ पार्टीको नेतृत्व परिवर्तन भएसँगै निवर्तमान प्रधानमन्त्री बोरिस जोनसनको कार्यकाल पनि टुङ्गिएको छ । उनले मंगलबार प्रधानमन्त्री कार्यालय १० डाउनिङ स्ट्रिट छाड्ने अन्तर्राष्ट्रिय समाचार संस्था रोयटर्सले जनाएको छ ।

उनले स्कटल्याण्डको भ्रमण गरी महारानी एलिजावेथ द्वितीयलाई औपचारिक रुपमा राजीनामापत्र हस्तान्तरण गर्ने कार्यक्रम रहेको जनाइएको छ । विभिन्न प्रकरण एवम् विवादमा फसेपछि जोनसनले गत जुलाई महिनामा पदबाट राजीनामा दिएको घोषणा गरेका थिए ।

ट्रसले पनि महारानीसँग भेट गरी नयाँ सरकार बनाउनका लागि प्रक्रिया थाल्न आग्रह गर्ने जनाइएको छ । बेलायतमा सन् २०१५ मा भएको आम निर्वाचनपछि प्रधानमन्त्री बन्ने ट्रस चौथो कन्जरभेटिभ नेता हुन् ।

हाल युक्रेनमा जारी रुसी आक्रमण, बढ्दो मूल्यवृद्धि, राजनीतिक विभाजन लगायतका समस्याको समाधान गर्नु उनका लागि चुनौती रहेको विश्लेषण गरिएको छ ।