काठमाडौँ- स्थानीय तहको निर्वाचनमा काठमाडौं महानगरपालिकामा गठबन्धनका तर्फबाट मेयर पदमा उम्मेदवार बनेकी नेपाली कांग्रेसकी नेतृ सिर्जना सिंहले वरिष्ठ नेता रामचन्द्र पौडेललाई जवाफ दिएकी छिन् ।

नेता पौडेलले जनतालाई हेपेर निर्णय गर्दा कांग्रेस काठमाडौं महानगरपालिकाको मेयरमा पराजित हुनुपरेको बताएका थिए ।

उनले नेतृत्वले वंशवादको आधारमा उम्मेदवार बनाएकाका कारण जनताले त्यसको सजाय दिएको टिप्पणी गरेका थिए । प्रकाशमान सिंहकी श्रीमती रहेकी नेतृ सिर्जना सिंहले नेता पौडेलको टिप्पणीको जवाफ सामाजिक सञ्जाल ट्विटरमार्फत् दिएकी हुन् ।

ट्विटरमा उनले लेखेकी छिन्, ‘ मेरो राजनीतिक यात्रा प्रकाशमानले भन्दा तपाईंले पैला चिन्नु भएको, थाहापाउनु भएको, (हामी छिमेकी जिल्लावासी) । मेरो बिहेअघि तपाई गोरखामा जेल पर्नुहुदाको समयमा मेरो साथ र सहयोग बिर्सनु भएको हो दाई ?’ उनले लेखेकी छिन्, ‘यो कुरा तपाईंको मुखबाट आउँदा अली सुहाएन की दाई ।’

स्थानीय तहको निर्वाचनमा सिंहले ३८३४१ मत ल्याउँदै दोश्रो भएकी थिइन् ।