काठमाडौं– भारत र पाकिस्तानबीच सिन्धु नदीको पानीसम्बन्धी सम्झौतामा हस्ताक्षर भएको छ । सिन्धु नदीबारे वार्ता गर्न भारत पुगेको पाकिस्तानी टोली र भारतीय पक्षबीच यसबारे सम्झौता भएको भारतीय समाचार संस्था एएनआईले जनाएको छ ।

सम्झौता स्थायी सिन्धु आयोगको ११८ औं बैठकमा तय गरिएको जनाइएको छ । भारतीय विदेशमन्त्रालयले एक विज्ञप्ति जारी गर्दै दुई पक्षबीच मैत्रिपूर्ण एवम् सौहाद्र्रपूर्ण वातावरणमा वार्ता भएको उल्लेख गरेको छ ।

वार्तामा भारतीय पक्षको नेतृत्व भारतीय सिन्धु जल आयुक्त एके पाल र पाकिस्तानी पक्षको नेतृत्व पाकिस्तानी जल आयुक्त सइद मुहम्मद मेहर अली शाहले गरेको जनाइएको छ ।

यससँगै दुबै पक्षले आगामी वार्ता पाकिस्तानमा आयोजना गर्ने सहमति समेत जनाएको एएनआईले जनाएको छ । यद्यपि आगामी वार्ताको मिति भने तय हुन बाँकी रहेको बताइएको छ ।