काठमाडौँ– बेनेडिक्ट कुम्बरब्याच अभिनीत सुपरहिरो फिल्म  ‘डक्टर स्ट्रेन्ज–इन द मल्टिभर्स अफ म्याडनेस’ चर्चामा छ । 

मार्भलको पछिल्लो फिल्म  ‘स्पाइडर म्यान : नो वे होम’ मा नै फिल्मको कथाको बारेमा दिइएको हिन्टले फिल्मलाई प्रतीक्षित बनाइरहेको छ । यसै फिल्मको वर्ल्ड प्रिमियर गत मंगलबार अमेरिकी सहर लस एन्जलसमा सम्पन्न भएको छ ।

प्रिमियरको तस्बिहरूलाई यसका मुख्य पात्रहरूले सामाजिक सञ्जालमा पोस्ट्याएका छन् । ट्रेलर झैँ फिल्म हेर्नेले यसलाई हरर शैलीको फिल्म समेत भनेका छन् । 

सामुएल मार्शल राइमी निर्देशित ‘डक्टर स्ट्रेन्ज-इन द मल्टिभर्स अफ म्याडनेस’ बेनेडिक्ट कुम्बरब्याचसँगै चिवेटोल इजोफोर, बेनेडिक्ट वङ लगायतको मुख्य भूमिका छ । मार्भल स्टुडियोद्वारा आयोजित प्रिमियरमा कलाकारहरू बेनेडिक्ट कम्बरब्याच, एलिजाबेथ ओल्सेनसहित उपस्थित रहे । फिल्ममा अभिनेता बेनेडिक्टले स्टेफन स्ट्रेन्ज पात्रको भूमिका निर्वाह गरेका छन् । मल्टिभर्स काल्पनिक संसारमा प्रवेश गरेपछि डक्टर स्ट्रेन्जले खेप्नुपर्ने चुनौती दोस्रो श्रृंखलाको कथावस्तु हो । 

यसका लागि मर्भालले वेब सिरिज ‘वान्डा भिजन’ र फिल्म ‘स्पाइडर म्यान : नो वे होम मै मल्टिभर्सको संसारलाई चिनाएको थियो । त्यहीँ छिटपुट कथालाई फिल्ममा निरन्तरता दिइएको छ । मार्भल सिनेम्याटिक युनिभर्सका सदस्यहरू आइरन म्यान, क्याप्टेन अमेरिका, ब्ल्याक विडो नरहेपछि पुराना सदस्यहरूलाई दर्शकको अपार माया प्राप्त भइरहेको छ । 

यसको पछिल्लो उदाहरण स्पाइडर म्यानले पाएको दर्शकको साथ पनि हो । पछिल्लो समय मार्भलले ‘मुन नाइट’ लाई समेत सिरिजबाट दर्शक समक्ष ल्याएको छ । यो मार्भलको पछिल्लो सुपर हिरो हो ।